UMD NFLC Hausa Lessons/32 The Flux of Life: Heed Time, Don't Waste It
More actions
Overview
- Lesson Title: The Flux of Life: Heed Time, Don't Waste It - This publication describes the author's opinion about time management.
- Language: Hausa
- Topic: Culture/Society
- ILR Level: 2+/3
- ACTFL Proficiency: Superior, Advanced-High; This ACTFL rating is an approximation based on the ILR level
- Modality: Reading
- Learning Objective: Maintenance & Improvement
- Subject Area: Language
- Material Type: LO
- Publication Year: 2007
- ObjectID: HAUS_12026
Transcript
| Original | Translation |
|---|---|
|
The Flux of Life: Heed Time, Don’t Waste It Sinadarin Rayuwa: Ka Kiyaye Lokaci, Ba Ɓata Lokaci A makon da ya gabata, mun tattauna kan matakalin nasarar rayuwa na farko, wanda kuma ya kasance ilimi; mai biye masa shi ne lokaci. Don haka a wannan makon zamu tattauna ne game da lokaci, wanda masu azancin magana ke ce wa ba ya jiran ɗan wani. Lokaci a rayuwar ɗan Adam abu ne mai matuƙar muhimmanci. Daratta shi da sanya shi cikin kula na ɗaya daga cikin sinadaran inganta rayuwar mutum. Alhali kuwa nuna shakulatin ɓangaro da shi kan iya haifar da koma baya da taɓarɓarewar al’amura ga ɗan Adam. Rayuwar mutum gaba ɗayanta na gudanuwa ne a cikin da’irar lokaci, kasancewar ba wani abu ake kira lokacin ba face abubuwa uku: Jiya da yau da gobe, sai kuwa ƙannensu, wato: ɗazu, da yanzu da anjima. A cikin waɗannan ne mutum ke rawarsa da tsallen baɗaken rayuwarsa ta yau da kullum. A cikinsu ne yake gudanar da duk wasu al’amura na yau da kullum. Idan kuwa haka ne, ashe tabbas lokaci ɗaya ne daga rukunnan sinadaran rayuwa. A matsayinka na mutum mai son cin nasara a rayuwa, to makamin da zaka yi amfani da shi cikin fa’ida da samun ingancin gudanuwar rayuwar yau da kullum, shi ne lokaci. Ba wani saddabaru ka ke buƙata ba, ba wajen Malam Gobe da Nisa za ka tunkara ba, ba wani bori ko tsafi za ka doka ba; kuma ba kwanciya za ka yi rashe-rashe a gado ba. Babu ɗaya ƙanwar biyu. Abin da kawai ka ke buƙata shi ne, ka yi wa kanka kyakkyawan tsarin amfani da lokaci kamar yadda ya dace. Bayan ka yi tsarin kuma, sai ka bi shi sau da ƙafa wajen aikatawa kamar yadda ka tsara, babu daɗi balle ragi! Misali, kar ka sake ka ce zaka bari sai anjima, abin da ka san zaka aikata a yanzu. Kada ka ce bari in bari sai gobe, muddin ka san zaka iya aikatawa a yau. Idan ka ce zaka jira zuwan wani lokaci alhali babu abin da zaka yi yanzu, to lallai ka faɗi jarrabawar; lokaci ya wuce ad kai ke nan. Wannan zai sanya ka kasance ɓutal a rayuwa. Domin kuwa zaka tara bashin abubuwa da yawa a rayuwa. Ya kamata a yanzu ka gane abin da ake nufi da bayanin da ya gabata. Ka gane kuwa? Bari in ƙara warware maka al’amarin. Ka san dai kana da buƙatu a rayuwar yau da kullum ko? To karkasa lokacinka zuwa gida uku a kowace rana zuwa Safiya, da Rana, da Dare. Ɗebo buƙatunka na safe ka jera su bisa jaddawali, karkasa su gida-gida, sai ka zaɓi waɗanda zaka aikata a ranar kuma da safe. To ka tabbata ka yi haka, to za ka samu sauƙin gudanar da a’amuranka. A taƙaice abin da nake nufi a nan shi ne, ka kasance mai yin tsari ga rayuwarka. Safiya ta shige kuma mun shiga rana ko? Nan ma sai ka bi sahun jaddawalin buƙatunka na rana, ka bi su ɗaya bayan ɗaya ka aikata su daki-daki. Haka ma idan dare ya riske ka, duk dai haka zaka yi. Abin buƙata shi ne, kada ka ƙure kanka, kada kuma ka sanya ganda ko kasala. Kai ka fi kowa sanin irin ƙarfinka, da irin muradin yawan buƙatunka. Ka san abin da zaka iya gudanarwa, ka san kuma abin da ba zai samu ba. Muhimmin al’amari dai shi ne, ya kamata ka gane cewa; kowane abu na da lokacinsa, sai ka sanya komai naka a bagirensa. Idan yanzu zai aikatu, kada ka jira, idan kuwa sai gobe ko nan gaba, sai ka jefa shi can. Idan Allah mai kowa da komai Ya nuna maka lokacin, kuma Ya taimake ka da ikon aikatawa, sai ka aikata. Ba ka ida fahimta ba dai? Ɗan biyo ni a hankali dai, abin ba na garaje ba ne. ka duba yanayinka, ka gane irin rukunin da kake a cikin al’umma. Idan ka gano haka zai taimaka ka gane irin buƙatunka a rayuwa. Domin kuwa mutane sun bambanta ta wajen buƙatu daidai da yanayin kowa. Misali, matashin saurayi ya bambanta da magidanci. Ɗalibin makaranta ya bambanta da ma’aikaci. Uwargida da ke zaman aure a gida, ta bambanta da budurwar da ke makaranta ko sana’a. Kai dai ka san kanka kuma ka san buƙatunka, don haka sai ka kasafta su daidai da yadda zaka aiwatar da su a daidai lokutan da ka ba kowane al’amari. Bari in ƙara doka maka wani lissafi: A matsayinka na mutum, dole ne ka buƙaci waɗannan ayyukan: Neman ilimi, gudanar da ibada, aiki, sana’a, shaƙatawa, barci, cin abinci, da dai sauransu. To su na ke nufin ka yi wa jaddawali, ka ware wa kowane aiki lokacinsa; kuma kada ka sake lokacin wani abu ya shiga cikin na wani. Ƙwarai kuwa, zaka iya bin wannan tsarin, muddin dai ka yi tsari mai kyau, kuma ka bi shi sau da ƙafa. Wani abin da kuma zaka yi shi ne, a kullum da dare kafin ka kwanta; ɗauki alƙalami da takarda ka lissafa abubuwan da ka tsara wa kanka. Ka tambayi kanka, waɗanne ne ka aikata a daidai lokacinsu? Waɗanne ne ka samu nasarar aiwatarwa bisa samun kyakkyawan sakamako? To in Allah Ya kai mu gobe, sai ka sake kwatawa. Da haka nasara zata zaike maka, saaboda daratta lokaci ba ɓata lokaci! Har kullum ka sanya abu uku a zuciyarka. Na farko, jiya, ta wuce, sai ka manta da ita. Na biyu, yau mu ke ciki, tunkari aikata abin da ka tsara a cikinta don fa’idar rayuwarka. Na uku, gobe, ita kuwa bata zo ba, sai ka shirya zuwanta bisa kiyaye kura-kuran da ka aikata jiya; don gyaransu idan goben ta zo. Idan ka yi haka, babu shakka zaka ci ribar lokaci, domin kuwa shi ne babban sinadarin gudanar rayuwar ɗan Adam; kuma ba ya jiran wani mutum! Barkanmu da shiga sabon watan ibada mai alfarma. Allah Ya sa mu dace da albarkokin da ke cikinsa, amin. A sha ruwa lafiya! |
The Flux of Life: Heed Time, Don’t Waste It Last week, we discussed the steps to success in life, the first of which is knowledge; the one following this is time. So this week we will have a discussion about time, which those who speak sensibly would say, it waits for no one. Time in human life is an extremely important thing. Respecting it and paying attention to it is first among the key ingredients for strengthening a person’s life. Whereas showing carelessness towards it can bring about a retreat into the stagnation of human matters. A person’s life takes place entirely in the circle of time, being that there is nothing that one can call time except three things: yesterday, today, and tomorrow – and their younger siblings: that is, just a second ago, right now, and in a little while. It is these things that always govern every other matter. If this is so, then indeed time is certainly number one among the various groups of life’s key ingredients. In your position as a person who wants to succeed in life, the thing that you always need to use for getting strength in running your life is time. There is no special secret that you need, no powerful sorcerer that you can approach, no spirit or fetish that you can call on, and no lying down and lingering in bed. Not a one of them, much less two. The only thing you need is to make for yourself an excellent plan for using time appropriately. And once you make this plan, follow it exactly as you arranged; no pleasure, let alone skimping! For example, don’t keep saying that you’ll leave for later that which you know you should do now. Don’t say let me leave it until tomorrow, when you know you can do it today. If you say that you’ll wait for another time, and do nothing now, then indeed you have failed the test. Time has passed you by. This will cause you to become miserable in life, because you will carry a lot of life’s debts. You should now understand what is being implied by the foregoing explanation. Do you understand? Let me continue unraveling the matter for you. You know that you always have various needs in life, right? Then divide up your time into three portions each day: Morning, Afternoon, and Night. Set aside your morning needs and line them up on a schedule, divide them into portions, then choose the ones that you will do each day in the morning. If you are certain to do this, then you will have an easy time running your affairs. In brief, the thing that I’m suggesting here is this: that you become an organizer of your life. Morning passes along and we come into the afternoon, right? Here as well, you should follow an organized schedule for your afternoon needs, and follow up on them one by one and do them in order. This way when evening catches up to you, you will have finished all of this. The crucial thing is this: don’t restrict yourself, and don’t do too much or get lethargic. You know better than anyone the kind of strengths and needs you have. You know what you will be able to control, and you also know what can’t be obtained. The most important matter is this: you must understand that everything has its time, so you must put everything of yours in its proper place. If there’s something that needs doing now, don’t wait; and if it’s for tomorrow or beyond, then toss it there. When almighty God shows you the time, and helps you with the power to do something, then you should do it. You don’t understand yet? Then follow me a bit further and carefully, let’s not make haste. Take a look at your condition, and see the kind of groups that there are within the population. If you look closely at this, it will help you to see the kind of needs that you have in life. Because people are different as to their exact needs and condition. For example, a teenage boy is different from a householder. A school student is different from a worker. A woman who becomes a housewife is different from a young girl who is in school or a trade. Only you know yourself and your needs, and because of this you should divide them exactly according to how you will carry them out for the exact amount of time that you give each matter. Let me continue by hitting you with some calculations: In your position as a person, you have a need for such activities as seeking knowledge, practicing your religion, work, occupation, leisure time, sleeping, eating, etc. Well, these are what I suggest you put in a schedule, and allocate to each activity its own time. Don’t change the time of one thing so it enters into that of another. You should be able to follow this arrangement, provided that you make a good arrangement, and you follow it precisely. Something else that you should do is this: every night before you go to bed, put pen to paper and calculate the things that you arranged for yourself. Ask yourself, which ones did you do exactly at their times? Which ones did you have success carrying out, according to the great things that resulted? Well, if God brings us to another day, then you should do it again. This is how success will come to you, by respecting time, not wasting it! You should always remember three things. First, yesterday goes by, and then you forget about it. Second, today we are in the midst of it, so go ahead and do what you have arranged in the midst of it in order to benefit your life. Third, tomorrow, will not come, unless you prepare for its arrival according to yesterday’s careful plans, in order to repair them for when tomorrow comes. If you do this, without a doubt, you will reap the rewards of time, for it is the major ingredient of running human life, and it doesn’t wait for anyone! Our blessing upon entering the new month of sacred prayer [Ramadan]. God allows us to succeed from the blessings that are within him, amen. Be in good health! |
Glossary
| Hausa | Hausa Meaning | English Meaning |
|---|---|---|
| Shakulatin ɓangaro | Wannan salon magana ne mai bayyana halin rashin kula. | This is a saying that describes an "I do not care" attitude. |
| Da’irar | Wannan na nufin wata matattara ko dandali. | Describes an avenue or stage where an event takes place. |
| Tsallen baɗaken | Yin sama da ƙasa ko kuma hidimomin rayuwa | This describes the struggles in life. |
| Saddabaru | Yin wata dubara ta hanyar sihiri ko wata hikima ta dabam. | Tricks or manipulations or magic. |
| Tunƙara | A fuskanci ko a je wajen wani abu ko mutun ko wata matsala. | To approach or confront something or someone. |
| Ɓutal | Ɓutal ko ƙutal na nufin na baya ko na ƙarshe a rayuwa. | To be the last or to be left behind in life. |
| Gida-gida | Wannan na bayyana raba abu kashi-kashi | Seperating into categories or groups. |
| Ganda | Wani nama ne na ƙafar saniya ko kai amma anan ana bayyana kasala ne. | This is a word description of cow feet or head, but in the text it is used as a synonym for lethargy. |
| Bagirensa | Bagirensa ko ɓangarensa na nufin lokacinsa ko gefensa. | Each item or thing is done at its own appointed time. |
| Sau da ƙafa | Bin mutun ko wani abu daki-daki ko ɗaya bayan ɗaya. | Follow someone or something closely or step by step. |
Notes
| Hausa Notes | English Notes |
|---|---|
|
Kowa na da irin fahintar shi dangane da lokaci kuma wasu ma na ganin cewa sanin mahinmancin lokaci sai mai hankali. Wasu masu bin adinai kamar musulmi ma sun yarda da cewa albarku biyu da ke kubce musu daga wurin Allah sakamakon ayyukan nagarta da suke yi sune lafiya da lokaci, kuma ya kamata kowane musulmi ya yi anfani da kashi uku bisa huɗu na lokacin shi ga ibada kowace rana. Cikin wasu ƙasashen Afrika ana sako-sako da lokaci don haka abun da ƙaɗai ke iya cin lokacin jama’a sun haɗa da harakokin bukukuwa, wai sauran harakoki na iya jira har daga baya saboda mutane na ganin akwai lokaci da yawa a gaba. Wasu masu ilimi tattalin arziki na cewa lokaci kaɗai ne ba’a gane ba tsakanin abun hanu, ilimi da kuma shi kanshi lokacin. Wasu na ganin rayuwa ƙwarara ce, wasu kuma na ganin ba’a iya wuce sinadaran rayuwa.Ɗaya daga cikin hanyoyi da za mu iya riƙewa ko sa ido ga sinadiran rayuwar kuwa na iya haɗawa da haɗa da ganewar halin ra’ayin mu ko wasu halayen mu da kuma yanda muke ganewa ko fassara duniya da harakokinta. http://www.boloji.com/individuality/06024.htm http://www.islamonline.com/cgi-bin/news_service/spot_full_story.asp?service_id=763 http://williamjamesstudies.press.uiuc.edu/1.1/perley.html |
Different people have different understanding of time and time management. Some believe “in general, sensible people know the importance of time.” Some religious groups like the Muslims believe that the two blessings that many people loose for doing good deeds are health and free time and that a Muslim ought to use ¾ of his time in prayers everyday. In some African countries, time is taken for granted and the only priority when it comes to time is during a festive activity. People believe that there is always enough time, and so other things can wait. Some intellectuals (economists) believe that time is the least understood of the three types of input (material goods, skills and time). To some life is influx and to others the flux of life and experience can never be superseded. One of the ways to maintain an eye on the flux of life could include the cultivation of a self critical awareness of our temperament attitudes, moods and preconceived ways of interpreting the world. http://www.boloji.com/individuality/06024.htm http://www.islamonline.com/cgi-bin/news_service/spot_full_story.asp?service_id=763 http://williamjamesstudies.press.uiuc.edu/1.1/perley.html |
CONTENT SOURCE: Bashir Yahuza Malumfashi (2006 September 29). The Flux of Life: Heed Time, Don’t Waste It. Aminiya Newspaper. N/A: Media Trust Limited .
Objective: Demonstrate your core comprehension.
Content description: This publication describes the author's opinion about time management.
XML
<activity>
<problemset>
<problem correctindex="2">
<choices>
<opt>
<eng-response>According to the author of this editorial time is the next key to success after education. He advised that we should value our time and make an effective use of our yesterday, today and tomorrow by making a daily personal time table. We should set our priorities and ignore any of our activities that can wait until later, and then make an evaluation of our daily activities at night. He concluded that our success in the practice of time management will determine our success in life and everyone who follows it will succeed in life.</eng-response>
<response>Marubucin ya bayyana cewa lokaci ne na biyu bayan neman illimi cikin matakalan nasarar rayuwa. Ya shawarce ce mu da cewa mu ba jiya , yau da goben mu muhimancin kuma mu yi kyakyawan anfani da su ta wajen karkasa lokacinmu da ayyukan da za mu yi. Mu jera ayyukan da suka fi muhinmanci, sai mu ƙyale waɗanda muka san suna iya jira ko bamu buƙatarsu da gaugawa, in dare ya yi sai mu kimanta dukan ayyukan mu na ranar. Ya kamalla da cewa nasara rayuwarmu ta danganta da yanda muke sarrafa lokacin mu kuma duk wanda ya bi wannan hanyar, tabas zai ci nasarar rayuwar shi.</response>
<eng-fdbk>Incorrect.The author had a different opinion regarding daily priorities. What, specifically, did he mention our daily activities should include?</eng-fdbk>
<fdbk>Wannan ba daidai ba ne! Marubucin na da ra'ayi banban akan ayyukan mu mafi muhimanci. Mi ya faɗa game da abun da ya kamata ayyukan mu na yau da kulum su ƙunsa ?</fdbk>
</opt>
<opt>
<eng-response>Heed time; do not waste it because our lives revolve around it. The most important of our needs in life include what we eat, what we learn, our religious practices and relaxation. The author insists in this editorial that we should practice them, based on our time availability factor. Before going to bed each night, we should evaluate our daily activities and focus on our success of the day. He concluded that we should work on our individual needs and always make tomorrow our priority, keeping in mind that time waits for no one.</eng-response>
<response>Ka kiyaye lokaci, kar ka ɓata shi saboda rayuwar mu ta danganta da shi. Buƙatun mu na rayuwa masu babban mahinmanci sun haɗa da abubuwan da muke ci, abubuwan da muke koyo, ibada ko bin addinin mu da hutu, kuma marubucin wannan rubutun ya dage da cewa mu aikata waɗannan abubuwa idan muna da lokacin yin su. Kowace rana kafin mu kwanta ya kamata mu kimanta abubuwan da muka aikata kuma mu sa ido ga waɗanda muka ci nasara da su. A ƙarshe ya kwatanta muna da cewa mu yi aiki da buƙatun mu, kuma gobe ta zama muna da muhinmanci da sanin cewa lokaci ba ya jiran kowa.</response>
<eng-fdbk>Incorrect! What advice did the author give us in practicing our daily activities? What is his opinion about managing time in the future?</eng-fdbk>
<fdbk>Ba daidai ba ne! Wane irin sharaɗi marubucin ya bada game da ayyukan mu? Mi ya faɗa game da tsarin lokacin mu a gaba kaɗan?</fdbk>
</opt>
<opt>
<eng-response>In this editorial Bashir Yahuza Malunfashi describes the importance of using our time wisely. Being organized by setting priorities on your daily activities and respecting them is a step to success in life. First identify your needs, as we all have different needs in life, and some of the most important ones include religion, sleep, work and food. He concluded that we will benefit from our time if we make yesterday our past, make the best use of today by fulfilling our commitments, and prepare for tomorrow by avoiding the mistakes of yesterday.</eng-response>
<response>Cikin wannan rubutu Bashir Yahuza Malunfashi na bayyana muhimancin anfani da lokaci cikin hikima. Matakin cin nasara a rayuwar mu shine idan muka tsara ayyukan mu na kowace rana kuma muka jera su gwargwadon mafi muhimmanci. Na farko dai ka gane buƙatun ka saboda kowa na da buƙatun rayuwa dabam-dabam , kuma addini, barci, aiki da abinci na cikin buƙatu masu mihimancin a rayuwa. Ya kammala da cewa zamu samu ribar lokacin mu idan muka manta da jiya saboda ta wuce, muka tunkari aikata abun da za mu yi, sai kuma mu shirya ma gobe mu kuma kauce ma kanmu da aikata ƙura-ƙuran jiya.</response>
<eng-fdbk>Correct! The main idea of the author is time management and he concluded with a support and description of his point of view that managing time is a step towards success in life.</eng-fdbk>
<fdbk>Daidai ne! Sarrafa lokaci ne maƙasudin marubucin nan kuma ya kamalla rubutun shi da bayyanin cewa tsara lokaci ne mataki na farko na cin nasara rayuwa.</fdbk>
</opt>
</choices>
</problem>
</problemset>
<instr type="eng">INSTRUCTIONS:
Choose the best summary.</instr>
<instr type="target">Umurni:Zaɓi taƙaitawa mafi dacewa.</instr>
<finish>Do you think evaluating your daily activities and time management at night will help you succeed in life?</finish>
<finish>How do you think the author's time management could be used successfully in a household with many family members?</finish>
<finishtl>Kuna ganin tsara lokaci da kimanta ayyukan mu na yau da kullum a kowane dare ka iya sa mu cin nasarar rayuwa?</finishtl>
<finishtl>A ganinku yaya gida mai iyali dayawa ke iya cin nasarar rayuwa wajen anfani da irin waɗannan dubarun na tsara lokaci?</finishtl>
<finish>How do you think the culture of a society can affect one's outlook on time management?</finish>
<finishtl>Yaya zaman jama'a ke iya shafar tsarin lokacin mutun?</finishtl>
</activity>